2016 оны 9 сарын 22
Хүсээгүй гэрлэлт ба ”Солонгос диваажин”

“Солонгосын иргэн, боломжийн амьдралтай, тэдэн настай тэр, 18-25, эсвэл 35 хүртэл насны эмэгтэйтэй гэр бүл болно”.

Ийм зарын дагуу монгол бүсгүйчүүд маань харийн нутгийг зорих боллоо. Хангалуун амьдралыг хүсч очсон эмэгтэйчүүдийг тэдэнтэй уулзуулахаасаа өмнө “Солонгос залуу чиний зургийг харсан, их дотно санагддаг болсон гэнэ. Чамтай уулзахаар Монголд ирж байгаа, ёс болгож хэдэн бүсгүйтэй уулзуулах хэрэгтэй байна” хэмээнэ.Бүсгүйчүүд уулзалтын үеэр солонгос эрэгтэйд таалагдсан болохоор “Би архи уудаг эрэгтэйтэй суухгүй, эсвэл Хотод өссөн болохоороо хотод л амьдарна” хэмээн гэрлэх гэж байгаа хүндээ шаардлага тавин үүнийг нь хүлээн зөвшөөрнө гэж боддог аж. Гэвч Солонгост ирсэн хойноо Монголд байхдаа ойлголцсон гэж бодож байсан зүйлүүд нь худлаа болохыг мэдэрдэг.

Тухайлбал, зуучлагчид гэрлэлт бүртгэгдсэний дараа эмэгтэйчүүдээс шагналын мөнгө шаардах ба нөхрийнх нь үлдээсэн хэрэгцээнийх нь мөнгийг дундаас нь булаах явдал гардаг ажээ. Зуучлагч өөртөө ашигтайгаар гэрээ байгуулан аль болох их ашиг авч бага хохирол амсахыг чухалчилдаг. Гэрлэж байгаа хүмүүс нэг талт гэрээнд гарын үсэг зурахаас өөр аргагүйд хүрдэг байна.

Үүнд:
-Хуурамчаар гэрлэсэн буюу тодорхой шалтгаангүйгээр салах бол нөгөө талдаа 10 мянган ам.доллар төлнө.
-Монголд байхдаа гэрлэх шийдвэр гаргаад нэг оронд орох юм уу, сүй тавих ёслол хийсний дараа аль нэг тал нь гэр бүл болохоос татгалзвал татгалзсан тал ньзуучлах төвд 2000 ам.доллар төлнө.
-Гэрлэх өргөдлөө өгсний дараа гэр бүл болохоос татгалзвал татгалзсан тал нь зуучлах төвд 4000 ам. долларын төлбөр төлнө.
Мөн гэрлэхээр сонгогдсон эмэгтэй болон түүний ээж, аавтай гэрээ байгуулан “Солонгост очсон хойно зугтаж, орговол эцэг эх нь зуучлах төвд 4.500.000 төгрөг буюу 3.700.000 вон төлнө” гэсэн гэрээнд гарын үсэг зурахыг шаарддаг байна.

“ХОСУУД” ДОЛОО ХОНОГТ Л ГЭРЛЭДЭГ

БНСУ-ын нэг тосгонд амьдарч байгаа есөн монгол эмэгтэйн нэг нь өглөөний 05 цагт босож тариалангийн талбайд ажиллаж байхад нөгөө нэг нь согтуу нөхөртөө зодуулдаг. Хүүхэд гаргасангүй хэмээн хадам ээждээ зодуулдаг ч эмэгтэй байдаг ажээ. Түүгээр ч барахгүй монголчуудтай уулзахыг хориглон, бэлгийн дарамтад оруулдаг байна.
-“Монгол эмэгтэйчүүд юунаас болж ийн хохирч байна вэ” гэсэн асуултад Олон улсын шилжин суурьшилтын байгууллагын Солонгос дахь төв, төслийн зохицуулагч Чул Хёо Ким ийнхүү хариулж байна.
-Зуучлалаар танилцсан хүмүүс бие биеийнхээ талаар мэдээлэл сайн аваагүйгээс гэрлэснийхээ дараа үл ойлголцолд хүрдэг. Учир нь гэрээний хосууд долоо хоногийн дотор суудаг болохоор нэг нэгийгээ танина гэж байхгүй шүү дээ. Хэл мэдэхгүй, ааш араншин, зан заншил ялгаатай, амьдралын хэв маяг өөр, гэрлээд салсан тохиолдолд тэдний виз цуцлагдана. Гэр бүл гэдэг маань хоёр талын хүчин чармайлтаас л шалтгаалдаг гэж ярилаа. Солонгосын үйлдвэр, аж ахуйн эзэд гадаадын ,эрэгтэй ажилчин авч ажиллуулахыг илүүд үздэг болсноор Монгол эмэгтэйчүүд тус улсад ажиллаж, амьдрах хүсэл байв ч ажил хийх “боломжгүй болжээ. 1998 онд 46 эмэгтэй Солонгос хүнтэй гэрлэж байсан бол сүүлийн 10 жилийн дотор энэ тоо 967 болтлоо өссөн байна.

МОНГОЛ ЭМЭГТЭЙЧҮҮД ЭРХЭЭ ХАМГААЛУУЛНА

БНСУ-ын иргэнтэй гэр бүл болсон монгол эмэгтэйчүүдийн эрхийн хамгаалал, тухайн улсын түүх соёл, ёс заншил, гадаадын иргэнтэй гэр бүл болох хууль тогтоомж, эдлэх эрх үүргийн талаар анхан шатны мэдээлэл өгөхөөр хоёр улсын төрийн болон төрийн бус байгууллагууд хамтран ажиллаж эхэллээ. Манай улсаас Нийгэм хамгаалал хөдөлмөрийн яам, Гадаад хэргийн яам, Иргэний бүртгэл мэдээллийн улсын төв, Хүйсийн тэгш эрхмйн төв ТББ, БНСУ-аас Солонгосын Гэр бүл эрүүл мэнд, Халамжийн яам, Олон улсын шилжин суурьшилтын байгууллага, Солонгос дахь НҮБ-ын Хүний эрхийн бодлогыг хангах төв, Сөүлийн Үндэсний их сургуулийн Нийгмийн хөгжил. Бодлого судлалын хүрээлэн оролцож байна. Хамтран ажилласнаар тус улсын иргэнтэй гэрлэж байгаа монгол эмэгтэйн эрхийг хамгаалан, тухайн нийгэмд дасан зохицоход нь тусалж, хохирогч болгохгүй байх талаар санал солилцож байгаа ажээ.

SOURCE: zuuniimedee.mn

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...